Desa Baok
TAUN 1956 kungsi diganti ngaranna jadi Desa Sugihmukti, dumasar loba warga nu ngarasa era ku ngaranna nu mimiti, nya eta Desa Baok. Sanggeus diganti, di eta desa kahirupan jadi sagala susah, hese sandang susah pangan. Atuh masarakat sapuk mulangkeun deui eta ngaran.
Desa Baok teh salahsahiji desa nu aya di lelewek Kabupaten Kuningan. kahirupan masarakatna loba nu ngalumbara daragang ka Jakarta. Sawarehna mah jadi buruh tani, atawa ngingu ingon-ingon di lemburna. Pangna loba warga nu ngalumbara ka Jakarta, dumeh kaayaan daerahna kaceluk hese cai. Lamun heug datang usum katiga ratusan hektar sawah ngahgar. Keur sakalieun mandi jeung masak ge susah. “ampir 60 persen lalaki urang Desa Baok hirup arusaha di Jakarta. Nu araya di imah teh ngan pamajikan jeung anak-anakna wungkul,” ceuk Kustana, hansip di eta desa anu ngaku saban poe boga pancedn ngariksa kaamanan, dumeh imah masarakat taya kapala kulawaragana tea
Sok sanajan hirup di pangumbaraan, taya anu umah-umah di Jakarta. Ampir saminggu sakali maranehna marulang ka lemburna, bari mikeun ladang usaha ka anak pamajikanana. Sok komo kabehdienakeun mah patali marga beus urang Luragung Kuningan geus loba. Jakarta-Ciwaru teh sasatna dijadikeun jalan ka cai ku urang Desa Baok mah.
Neangan kahirupan di Jakarta jauh leuwih gampang batan di lembur nu ukur ngandelkeun sawah tea. Nu penting asal gede kawani jeung badag kadaek, neangan duit gampang kapesakan. “Neangan duit sapoe 75 rebu perak mah teu hese teu sing,” ceuk Agus (34) nu karek datang ti Jakarta make beus Luragung.
Agus salasaurang warga Desa Baok anu geus lima taun dagang emih goreng di lelewek Menteng Jakarta, saban minggu bmanehna remen mulang ka lemburna mun heug eusi pesak mucekil, ngan sapoe dua poe, terus miang deui ninggalkeun anak pamajikan di lembur.
Cenah urang Desa Baok mah tara ngarasa turun gengsi hirup di Jakarta teh. Meh ampir kabeh mah jarualan roko, emih goreng, nasi goreng, ngojeg, ngabeca, jadi supir bajay, jeung rea-rea deui. Ari meuting mah dimana wae tunduhna. Sakapeung sok nyicingan jongko boga baturna, di tajug, atawa milu di imah tatanggana nu aya di Jakarta.
“Pokona mah neangan duit di Jakarta hasilna kudu bisa keur kirimeun ka lembur,” ceuk Agus, bari hariweusweus, rek tumpak ojeg ti pertigaan Luragung muru ka Desa Baok.
Ku riabna urang Desa Baok nu neangan rejeki di Jakarta, kacida nguntungkeunana keur kapentingan pangwangunan di Desana. Nyieun masigit anu sakitu badagna lolobana ladang sodaqoh nu ngalumbara. Urang lembur kiwari ngawangun ku ngandelkeun tanaga. Imah-imah garedong, malah nu ngalumbara mareuli sawah, balong jeung ingon-ingon.
Meunang jodo di Desa Baok
Sejen deui pamadegan Rohmin (28). Ieu pamuda incah ti desa Baok ka Jakarta teh dumasar ngarasa era hirup di desana anu sok pangjejeleh pamuda desa pamuda sejenna. Pedah ngaran dessana desa Baok. Ari ngaran Desa Baok ceuk urang Sunda mah meureun, apal,”
Tah eta alesan kuring jeung sabatur-batur pangna hijrah ka Jakarta teh. Malah kuring mah masih keuheul keneh, kabogoh kolu megatkeun katresna pedah narah ulin ka desa Baok lembur kuring tea,” ceuk Apay baturna Rohman. Anu sapopoena dagang roko di Jakarta.
Apay jeung Rohim, sok narah nyebutkeun ngaran desana, mun heug aya urang Jakarta nanyakeun dimana lemburna. Pedah ngarasa era tea ngaranna Desa Baok, mindeng nyebutkeun ngaran desa sejenna. Tah, ku loba nu ngabarohong atawa ku embungna ngaku kana ngaran desa anu sabenerna, dina emprona aya jalma luar nu aya kaperluan ka urang Desa Baok sok hese neangan. Pon kitu deui mun nu rek mere rejeki sok bolay, da teu kapanggih lemburna. “Abdi ngarasa prihatin ku urang dieu nu ngalumbara heug ngarasa turun gengsi nyebut ngaran desa. Padahal mointong kuitu da nu ngaranan desa teh lain jalma jore-jore nya eta karuhun urang baheula, “ceuk Kustana, anu ngaku manehna mah teukungsi ngumbara ka Jakarta. Memang lain kiwari urang Desa Baok ngarasa era ku ngaran desana baok tea. Kolot baheula ge sarua. Malah dina taun 50-an mah kungsi protes kudu gancang ngaran desa teh diganti dumasar kasapukan warga di dieu, taun 1956 diganti ngaranna jadi Desa Sugihmukti. Hanjakal umur desa anyar teh ngan cukup opat taunan. Kahirupan urang Desa Sugihmukti teu luyu jeung ngaranna. Mahabu gorombolan, hese sandang hese pangan. Welerti hese leungitna. Malah loba warga nu katarajang gering keuna ku panyakit malaria. “Ambeh leungit welerit atuh kapaksa 60-an diganti deui ka ngaran desa asalna jadi Desa Baok nepi ka kiwari,” ceuk satibi (70), inohong urang Desa Baok anu ngaku bareto milu icikibung malikeun ngaranna desa ka asalna. Memang bener sanggeus ngaran desa jadi Desa Baok welerit teh leungit. Basa keur mahabuna gorombolan jeung Gestapu, kabeneran taya saurang warga nu jadi korban. Tatanen ge bisa ngahasilkeun pikeun kahirupan wargana. Anehna kabeh diunakaeun aya keneh masarakat nu ngarasa era ku ngaran baok nepi ka manehna ngumbara bari neangan rejeki di Jakarta ninggalkeun kahirupan di lemburna.
Ongkoh geuning ngarasa era, ari mulang tetep we mulang ka Desa Baok. Malah teu saeutik pamuda luar nu anu ngajodo jeung awewe urang dieu.
Sejarah Desa Baok
Mbah Bulu Karuhunna Urang Desa Baok
ARI Mbah Bulu teh nya eta karhunna urang Desa Baok, anu baheulana kawentar gede wawanen jeung kasatria. Meh sa-lelewek Kacamatan Ciwaru sarerab ka Mbah Bulu teh. Nu matak ka ieu lembur taya nu kumawani ngaganggu da sarieuneun ku wawanen karuhun tea.
Mbah Bulu nu jangkung badag teh, di sakujur awakna pinuh ku bulu. Kumis baplang jeung jangggot ngarumbay. Karesepna lian ti tani ngariksa taneuh di lemburna resep pisan kana jogol jeung lawan-lawanna.
Basa keur mahabuna perang pajajaran kira-kira abad XV, Kangjeng Mbah Bulu kacida pisan nangtayungan warga di Ciwaru. Ku kituna di alam harita urang Ciwaru ngarasa aman tina bahaya musuh nu ngamarkas di Gung Asepan tapel wates Kuningan-Brebes.
Mbah Bulu ngawanti-wanti pisan sangkan masarakat Ciwaru resep ngolah tatanen, miara sasatoan jeung mulasara gunung nu pinuh ku kakayon pikeun kahirupan manusa.
“Tah ti harita urang Ciwaru hususna urang Desa Baok resep tatanen, da dicontoan ku karuhunna nya eta Mbah Bulu tea,” ceuk Satibi inohong warga Baok bari muka paririmbon ngeunaan Mbah Bulu tea. Samemeh anjeunna maot. Mbah bulu kungsi nangis, nitipkeun pagunungan Ciwaru ambeh ulah sirna diaralaan kaina. Nitipkeun ka warga Ciwaru ambeh resep macul ngolah lahan pasawahan jeung miara ingon-ingon. Ku pinuh kasieun tea, anjeunna ngahaja mere ngaran Desa Baok. Maksudna pikeun ngelingan yen karuhun Ciwaru teh nya eta Mbah Bulu tea. Kuburanana aya di lelewek blok Karang Desa Baok anu di lingkung kuburan masarakat di eta desa. Saban dinadranan ku urang Desa Baok jeung desa sejenna di Kacamatan Ciwaru. Sabada Mbah Bulu maot masarakat kacida wekelna ngolah lahan, miara leuweung jati jeung ingon-ingon di Gunung jeung miara ingon-ingon. Hasilna bisa ngahirup jeung ngahuripkeun warga Desa Baok jeung sakulibekna di Kacamatan Ciwaru. Hanjakal kabehdieunakeun mah eta papagah karuhun teh loba nu dilabrak ku rahayatna. Buktina, gunung-gunung nu baheula leubeut ku kakayon jadi bulistir. Antukna pasawahan hese cai sakalieun nginum jeung mandi ge mun heug usum tigerat mani hese beleke pisan.
“Nya eta atuh loba jalma curaling nalugaran leuweung taya banana masarakat urang dieu nu kiwari katempuhan susahna,” ceuk satibi nu sok remen nadran ka kuburan Mbah Bulu.
Kuheureutna lahan pasawahan nu kaceluk ngahgar tea, masarakat hese ancrub ka sawah. Mun dipaksakeun oge hasilna moal sabaraha. Sawatara kabutuhan hirup beuki dieu teh nerekel. Sok komo alam pangwangunan norobos ka Desa Baok, masarakat ge milu ngarojong eta pangwangunan. Kumaha pangaruhna? Nya buktina geuning Desa Baok ditaringgalkeun ku penduduk-pendudukna. Maranehna ngahaja balangsiar neangan rejeki di kota. Memang hade ku cara kitu teh, tapi geuning ditaranggalkeun ka kota Desa Baok neangan lalaki da ngalumbara tea, “ ceuk Satibi ngangres.
Tidak ada komentar:
Posting Komentar